美斯仍然有心有力。

阿根廷球王美斯正式同美職球隊國際邁亞密續約3年，意味呢位38歲前鋒好大機會踢到40歲之後，再考慮掛靴問題，同效力沙特豪門艾納斯嘅40歲宿敵C朗，隔空鬥「長命」，睇下邊位職業生涯較長。

美斯將於年底約滿，早前傳出佢有意重返歐洲搵食，現時最終落實同國際邁亞密續約3年，直至2028年底，如果美斯完成合約，屆時佢已經41歲，好可能留隊踢到收山。國際邁亞密班主之一嘅碧咸話，成功留住美斯，感到非常榮幸：「我哋將史上最佳球員帶到呢個城市，美斯一如既往非常投入比賽，渴望取得勝利，我哋好幸運可以擁有呢位優秀球員，佢對球壇作出非常大貢獻，並激勵新一代球員成為巨星。」

美斯2023年7年離開巴黎聖日耳門，加盟國際邁亞密，至今為球隊上陣82場入71球及37次助攻，包括今季以29個入波成為美職常規賽神射手。美斯協助國際邁亞密奪得上季常規賽冠軍，卻於季後賽第1圈出局，今季再接再厲，將於周六(25日)早上首場季後賽對拿舒維爾。

最強博彩盤路過關神器《串績王》：http://win.on.cc/football/